mitgliederwerden grey iconMitglied werden

Pegelstand

von Barbara Boss
© Rodja Galli, a259

Barbara Boss

Barbara Boss ist freischaffende Produktionsleiterin und Dramaturgin. Sie ist ein «Bärgmeitschi» aus dem Oberland, fühlt sich aber in der Stadt Bern heimisch. Sie mag guten Schnaps, Bruce Springsteen und Katharsis im Theater.

Es folgt das zähneknirschende Gedankentagebuch der Kolumnistin.

Tag 1
Ez sötti mer überlegä, über was i wott schrybä. Vilech über di Grossi Hallä ir Ritschuel. Passt mer guet, funktioniert irgendwiä alles dert – Festivalzentrum, Rollschuehdisco, zytgnössischä Tanz, klassischi Konzärt. Woby. Dasch när wider sonä Laudatio, mä sött ja kritisch sy.

Tag 2
Äbä gäll. Kolumnä.

Tag 3
Ez sötti älwä de scho es Thema ha. Leschti heimers doch vo grundlegendä Änderige i dä Förderschtrukturä für Kultur gha. Das mä dert scho müässt asetzä mit ökologischä Massnahmä. Woby. Das hanimer no z’wenig genau überleit, wiä das chönnt funktionierä, mä sött ja nid drischiessä mit so Ideenä, wo no nid usgryft sy.

Tag 4
Nüt. Eifach nüt.

Tag 5
Ez sötti eifach härähockä u hü. Am beschtä chunnts, weni würklech für öppis brönnä. Vilech, dasi findä, es söttä vil meh jungi Lüt involviert sy im Kulturbisness, ir Kulturpolitik, im Kulturjournalismus. Wiso nid mal es jungs Team d’Kommunikationsbüez fürnes Museum oder äs Theater la machä, im Jobsharing näbem Schtudium? Woby. Dasch när wider z’idealistisch, mä sött ja ir hertä Realität blybä.

Tag 6
Cha äch süsch öpper übernäh diä Wuchä?

Tag 7
Ez sötti abgäh – u ha eifach nüt. Gross, Boss. Vilech chöi si ja eifach so öppis druckä wiä: «Der Kolumnistin ist diese Woche nichts gelungen. Sie ist gescheitert. Es tut ihr leid.» Woby. Eigentlech duets mer gar nid so leid. Das muäss doch o Platz ha. Im Läbä u im kulturellä Schaffä: Zwyfel, Fragä, Lääri. Nid zfridä sy mit öppisem – u s’drumm ds nägscht mal besser machä. Grad nid wüssä wiä oder wo dürä – u im freiä Fall sy. Z’Bodä ga – u irgendwenn de scho wider ufschtah.

In diesem Sinne: Für mehr Scheitern!


Zur Übersicht

Folgen Sie uns

Anmeldung Newsletter

Wetter in Bern

laden